Leev Lütt,

de WM löpt on dat janze Drömeröm. So och de Demonstrazjone von dr NPD. En Jelseker­che hät de Polezei dat verbode, ofwoll se weeß, dat se domet bei Jerecht nit dörchkömmt. So es et dann och passeeht.

En Düsseldorf send se jet subtiler vörjejange. Bätes Schenkelberch von dr Düsseldorwer Polezei hät de Dompfbacke en nüe Kleederordnong verpasst: Möllsäck öm de Sprenger­stiwwele, Bomberjacke op lenks, Hokekrütztätoweeronge öwerkläwe för zom Beispill.

Steinhäusers Rolli, Baas von Düsseldorfs Kathole on Oßwalds Conny von de Blauköpp hant e Plakat jemaht, wo drop stung: "Düsseldorf gegen rechte Gewalt". "Schön", hant do de Lenke jedaht, "dat jildet also nit för ons". Se hant dann och rechtich dropjehaue on sojar ne Putz de Zäng usjeschlare. Dat kann et doch och nit sinn. Wenn dat de Häre Meisner odder Ratzinger bzw. Luthers Mätes odder de leewe Jott erfahre, süht et för denne Zwee äwwer mau us met Versetzong odder Beförderong.

Nix för onjot. Bes nähste Woch.
Üere