ech künnt off et hüülende Elend krieje för wat so em Fähnsiehe jebode wöhd. Bei de Private kann ech verstonn, wenn de Qualetät dr Bach eronger jeht on Sendonge von denne off von Sinnen send. Dat mieschde davon jehöht soweso en de ongerschde Schoblode. Die mösse noh de Enschaltquote schiele, för öm Kohle ze make. Do kann ech leech af- odder ömschalde.

Wat angersch es dat met de Öffentleche. För die mosste rechtich latze. Woröm mösse die ons trotzdemm noch met Werbong trakteere? Woröm dont die sech an jede Priesdriewerei för Sport- on Dopingveranstaltonge beteilije? Woröm sovill dömmleche Labersendonge? Woröm emmer noch dat Sabine Christiansen, ofwoll et för öwer der ehre Mest sojah e eeje Boch jövt [Minn Sonndäch met Sabine Christiansen]? Woröm es emmer noch dä Zuppekasper Biolek do, öwer dem schonn 1979 em öffensleche Rondfonk (WDR) jesaht wohde es, dat hä en journalestesche Ömweltkatastrof wör? Woröm deht kinne de Intendante mol drop opmerksam mache, dat Volksmusiksendonge zor Leidkultur jehöre on nit zor Leitkultur? Moss ech denn selvs ehsch all de Laberheinis on Knallcharje wie Beckmän, Elstner, Kerner, Motter Beimer on Consohte persönlech dotschlare, domet die endlech mol von de Mattschiev verschwende?

Äwwer et jövt noch Hoffnong. E besske besser es et morje on öwermorje öm 20 noh sibbe owends em Ehschde.

Nix för onjot. Bes nähste Woch.
Üere
Charle-Manes