Siemens: Skytrain on angeres


Leewe Kläuske Kleinfeld,

wat et do letzde Ziet an Nohrechte öwer Siemens jov, deht mech veranlosse, Üch als Baas von de Lade mol ze schriewe. Vill Ärjer mäht de Jehaltserhöhong, die Üch de Drickes vom Opsechtsrot anjebode hät. Wenn äwwer ne Mänädscher nit erkenne doht, wat e verjeftet Jeschenk es, dann nennt mr dä en "doowe Noss". Wenn eene de Endräch, die öwer em em Wikepedija-Lexekon stonn, dörch sinn Hoffschranze verschönere lässt, dann nennt mr dä en "Fatzke". Wä so jet nödich hät, hät secher kinn Ziet för wechtijere Sache. Wat es met dä Skytrain en Düsseldorf, dä duuernd stonn blifft? Losst en Seelwend dran baue. Dann könne de Lütt, die Ehr trotz Milljardejewenne entlosse wollt, ne stonnjebleewene Zoch rockzock en der nähste Bahnhoff korbele.

Saht för dat schreckleche Onjlöck met Üerem Transrapid nit, dat dat ne minschleche Fähler wör. Wenn en kleene Spellzüchieserbahne ne automatesche Stop enjebaut wehde kann, wenn e Hendernes op dr Streck es, es et janz klor ne Systemfähler, wenn Ehr do sojet nit hat.

Honorich wör, wenn Ehr dat Jeld von Üer Jehaltserhöhong för de Opfer spendeere on zoröckträde wöhdt. Dann könnt Ehr och de Boschtrommele engnoreere, die saren, dat Pierers Drickes soweso op Üere Afschoss us es, on Oggers Jünter an nem nüe Kapitel för si Boch "Niete en Nadelstriepe" am schriewe es. On Ehr hat Ziet, dat Jrondjesetz ze läse, wo dren steht, dat Eejedom verpflechtet.


Nix för onjot. Bes nähste Woch.
Üere
Charle-Manes