Vörschau


Leev Lütt,

2007 – wat deht et brenge? Zoehsch dat Jode: De Beidräch för de Ärbiedsloseversecherong senke e besske, on et jövt mieh Ongerstötzong för wennste Pänz kriss. Dat woret och schonn, denn annesons wöhd et rechtich bedresse. De jroße Staatskonst von ons Rejalt bestott en dr Haupsach us denne ehre Onverfroreheet, emmer mieh höhere Stüere, Afjowe on Jeböhre enzeföhre.

Dat fängt met de Märche- on de Versecherongstüer an. Et jeht wieder bei de Minijobs on beim Sprit. De Beidräch för Krankekasse on Fahrkahde steije. De Jeböhre för de Möllaffohr on Friedhöff jonnt erop. Doför wehde Pendlerpauschale, Sparerfreibedräch, Kengerjeld on de Koste för et Ärbiedszemmer jeköhzt. Beim Finanzamp sollste jetz sojah doför latze, wennste do en Stüerfroch verbendlech jekliert hann wells. On en de CSU loope Dölle eröm, die de PKW-Maut wolle. Woröm wöhd denne nit klor, dat mr de Koh, die mr melke well, nit schlachte soll? Ech künnt se all erschlare!


Nix för onjot. Bes nähste Woch
Üere
Charle-Manes