Schmitz Backes


De Redensaht "noh nit an Schmitz Backes vörbei sinn" hät de Bedüdong "noh nit alles henger sech hann", "noh nit alles öwerstange hann", "noh nit usser Jefahr sinn", "noh nit jesechert sinn". Se kütt us Kölle säht dä Sprochwesseschaffler Professor Wrede. Wenn do ne Bösewecht zom Stüpeschlach verordeelt wohde wor, föhrden ehm dr Wäch vom Franketorm, wo et Kaschott wor, dörch de Stadt bes zor Severenspohz. Kohz doför, op de Severensstroß 5, wor et Backhuus Schmitz. Do wor, so wöhd berechtet, dann de Stüpong zo Engk.

Dr Stüpeschlach odder Stüpestreech es en Körperstrof us em Meddelalder. Verordeelte wohde met nem Stüpbessem jeschlare. Dä Stüpbessem wor meest us Birkezweech, on do wore off spetze Steen dren. Dat Stüpe jov et en Europa bes ent nünnzehnte Johrhondert. En Stüpong wor em Jäjesatz zom Spießruteloope en onihrehafte Strof.

En Düsseldorf kolporteere se äwwer, dat die Redensaht ehre Ursprong en Düsseldorf hät. Donoh hädden ne jewesse Här Schmitz en Kischwäht en Bäckerei. Die wor en der Höh vom Rhing, wo dä jrod ne fiese Strudel hadden. Wenn de Böötches do heil dran vörbei wore, hant se jesaht, dat se "jot an Schmitz Backes vörbeijekomme wöre". Wat mennt Ehr, wat rechtich es?


Nix för onjot. Bes nähste Woch
Üere
Charle-Manes