Et Fähnsiehe es met Schold


Leewe Fritz Raff on leewe Markus Schächter,

Fähnsieh-Intendante wesse secherlech och, dat e Axjom ne afsolut fessstehende Jrondsatz es; en Tatsach, die kinne Bewies bruch. Eens von de Axjome, die et jövt, es, dat em Radsport op Düwel kommerus jedopt wöhd. Dat wor en de Verjangeheet eso, dat es jetz eso on dat wöhd och eso bliewe. Do moss mr schonn met ne janze Hoope Eenfalt jeschlare sinn, öm för do op angere Jedanke ze komme.

Dat Öffenslech-Rechtleche, et Ehschte on et 2DF, hadden deswäje beim Tour de France-Ärjer vom letzde Sommer öwerlaht, of et nit besser wör, op düere TV-Öwerdraronge von sonn Chemo-Toürkes ze verzechte on de Zoschauerbeidräch för jet Nötzlecheres ze verwende. Dann es äwwer doch öwerdrare wohde! Bejröndong: Noh däm Russchmess von Ullrichs Jan on Konzohte wör et met dem Dope vörbei. Wie kammer nor so blauööjich sinn? Datselve doht Ehr ons jetz wedder verzälle. Merkt Ehr eejenslech nit, dat Ehr e Deel von däm Problem sid?


Nix för onjot. Bes nähste Woch
Üere
Charle-Manes