Lütt, die us angere Länder jekomme send, hant beem Bezahle emmer noch ehr alde Währong em Kopp. De Törke sahden nit DM, songern Lira/si; de Perser Touman; de Tommys Pongk oswosf. Lang nohdäm de €URo enjeföht wohd, hadden mer noch de Mark em Kopp on domet jerechent. Eene €URo wor för ons emmer 2 Märk. Dat Ömrechne jeng mieh odder wennijer automatesch vonstatte.

Äwwer erjenswann kömmt de €URo doch dörch. Beispell: Letzde Schabbes wor de Jebohtsdachfier von minne Frönd Justus-Strolch. Hä wohden nünn! De Jebohtsdachwönsch wore villfäldich. Onger angerem en Kawenzmanns-Pizza bei Pino; en Rädches-Tour noh Zons met e deck Spajetti-Ies. Mar dat Lenkdrachefliejelosse es wäjens zo wennich Wengk usjefalle. Doför stung Monopoly-Speele an. Do moss vill jekooft on bezallt wehde. Wat soll ech sare: Statt de Bedräch en Mark anzesare wie et op de Kahde stott, jeng ons do onwellkörech "€URo" von de Leppe. Jetz esse als doch en ons Köpp anjekomme.