Kinne Fenderlohn


Leev Lütt,

wenn eene bei Aldi, Lidl odder Konzohte so e Enkoofswäjelche metnömmt, weil hä domet sinn Plürre leechter noh Huus kritt, es dat verbode. Mr es zwor, solang wies mr dat Kärke benotzt, de Besitzer dovon. De Ferme bliewe äwwer Eejedömer. Wenn dann alles us- odder ömjelade wohde es, on dat Vehikel erjenswo afjestellt wöhd, weil mr et dann nimmieh brucht, jövt mr domet dat Besitzrääsch dodraan op. Wenn Aldi, Lidl on Konzohte nit wesse, wo de Karre erömstonn, do se äwwer entdeckt on an dech jenomme häs, wöhd dodrus e Fondjot.

Dat moss an de Eejedömer (de Empfangsberechtichte) zoröckjejowe wehde. Weil so e Wäjelche nit mieh als zerka150 €URo (nü) koss, steht dech noh § 971 BJB doför ne Fenderlohn von 5 % zo. Do kanns äwwer drop wette, dat die arjumenteere, dat dat e jekläut Stöck wör on ki Fondjot. On doför bruche se nix ze zahle. De Fall kann jurestesch noch so klor sinn, Fenderlohn eruszeröcke, scheue die wie dr Düwel dat Weihwasser.


Nix för onjot. Bes nähste Woch
Üere
Charle-Manes