Ridder von de traurije Jestalt


Leewe Schorch Walker,

wemmer anfängt, e besske Resömee von Üer Rejierongsziet ze trecke, kammer schnell dr Endrock jewenne, dat et Üch so jonn künnt wie weiland däm Don Quichott de la Mancha. Dat es dr spanesche Ridder von de traurije Jestalt. Denn och bei Üch wor fass alles, wat Ehr so anjeleiert hat, jot jemennt. On och Ehr haddet emmer jode Jrönd doför. Äwwer die wore jenauso zosammejefriemelt wie beem Don Quichott. Deswäje es och bei Üch dat mieschde dovon erjenswann zom Bummerang jewohde on Üch vör dr Däätz jeknallt. Odder mr häddet Üch kapafdich öm de Horchlappe jehaue.

So wies jetz als wedder Üere böwerschde Jerechtshoff. Zom dredde Mol! Do hadder fleeßich alles, wat nor entfähnt noh al-Quaida-Bösewecht ussoh, enjesammelt, noh Juántanamo verbraht on do enbuchte losse. Dann hat Ehr Üch e listich Konstrukt usjedaht, för öm de Betroffene von de ordensleche Jerechtsbarkeet uszeschleeße. Äwwer noh dem Rechtersproch vom 12. Juno 2008 wöhd et domet nix. Och wenner Üch noch so sträube doht. Selvs wenner Üch noch e paah Tricks enfalle losst, et wöhd nix domet.

Doher ne jode Rot: Doht dat liedije Problem jetz noch vör dem Engk von Üer Ampsziet ordenslech räjele. Dann hadder en jode Schanks, nit als de amrikanesche Versjon vom Retter von de druurije Jestalt en de Jeschechte enzejonn.


Nix för onjot. Bes nähste Woch
Üere
Charle-Manes