Faruk I kom us Kairo on wor Könich von Äjypte, dr vörletzde. 1952 wohd hä wäjens persönleche Bereecherong, Korropzjon, Mess- on Jönstlengswehtschaff vom Jeneral Najib afjesetzt on ent Exil jescheckt.

De zwedde Faruk kütt us Anatolije on heeßt Şen (Schen). Bei de Volkshochscholl en Düsburch hät hä 1981 ne Job jekritt för de Enjliederong von Usländer. 1985 wohd hä Baas vom Zentrom för Törkeistodije. Als Baas hät hä sech jedaht, künnt hä nu so schalde on walde wies de angere Pascha. Dat hät en Pröfong dörch de Landesrechnongshoff erjäwe. Donoch hät Faruk II 2001 bei e Jelare met 16 Personne 42 Mennüs verkimmelt on dozo noch jede Menge Wing on Schabau. Jo, so es dat halt em Orijent. Şen, Jottseidank Metjleed en de SPD, dorft dann äwwer enfach noch e paah Personne nohmelde.

Politesch es hä e besske obskur. So hät hä 2006 enfach de osmanesche Jenozid an de Armenijer jelöchnet. On 2008 hät hä dann de Törke als de nüe Judde Europas bezeechent. Dat wor dann doch jet zo vill. Mr hät em drop dr Stohl vör de Dör jestellt. Äwwer dat wor och nor en frängich Moßnohm. Hä kritt si Jeld wieder on soll dann och noch johrelong beem Opbau von en deutsch-törkesche Uni en Izmir metwerke. Dat hät ons Laschets Armin enjebrockt, onsere Famillijeminester. Alles op Stüerzahlerkoste.