Feije Raffzšng em Pahlament


Leev Lütt,

de 187 Afjeohdnete em Düsseldorwer Landdach send ons leev on düer. Mieh düer als leev. Se krieje jede Mond mieh als nünnenhalfduusend €URo Diäte. Ejal off se en de Quasselbud dörch Afwäseheet jlänze odder off Pahlamentsferije send. Dat litt dodraan, dat die de Höh von ehre Bezöch selfs bestemme könne.

Öm de Erhöhonge ze rääschfähdije, falle denne räjelmäßich de dollste Bejröndonge een. Se nämme sech doför nit de Renteanpassonge zom Maßstab, songern verweese leewer op de Jehaltserhöhonge von Bank- on Bahnmänädscher. De öffensleche Proteste, die sech bei de Diäte-Erhöhongsandräch räjelmäßich opdohden, wor enne dann doch so peenlech, dat se beschlosse, däm en Zokonft ussem Wäch ze jonn. Äwwer wat heeßt dat nu? Wolle se könftich op de Diäte-Erhöhonge verzechte? Odder die an de Entweggelong von de Rente anpasse?

Enä, nix von däm. Se wolle nit op de Erhöhonge verzechte, songern mar op de Andräch on de Bejröndonge doför. Wie dat? "Jo", säht Dinthers Rejina, Baas vom Landdach, "wemmer en Erhöhongs-Automatik enföhre, falle de Diskussjone dodröwer könftich janz eenfach fott". On domet sech dat och rechtich lohne deht, wöhd jlichziedich de Bemessongsjrondlach för Diäte-Erhöhonge opjebessert on de Renteanwahdschaffsziet för Afjeohdnete von fönf op zweeonhalf Johr halbeeht.


Nix för onjot. Bes nähste Woch
Üere
Charle-Manes