zenger vörjestere es Fröhleng, dr jeföhlde. Endlech es dat Drisswäder vörbei. Dat wor nit nor de Minsche op dr Senkel jejange, songern och minn Kanare. Die hadden sech noh de Wenterpuus jeweijert, wedder mem Quinkeleere anzefange. Wedder ne Henwies op de Kalender noch minn Drohong, enne e Fötterke afzetrecke, hät jet jenotzt. Jetz senge se wedder. Öm de Wett. En wahre Freud.

De Lütt notze dr Fröhleng. Zo Foß, mem Rädche, Mopped, Auto, Tram odder Bahn jehdet erus en de Nator. Manche jonnt och op et Wasser odder en de Loft. Nor rus, dat Wäder notze. Usserdäm bejinne am Wocheengk de Poschferije. Vill Lütt verreese odder mache Üsflöch. Jode Anjebode jövt et jenoch.

Ens dovon es dat Freilechtmosom en Mechernich-Kommere. Schonn en normale Ziede en Rees wäht. För de 11. bes zom 19. Aprel 2009 hannt se sech do äwwer jet Besongersch enfalle losse: "Johrmaht von Annodozemol met Kermes us de Kaiserziet". Et jövt zietjerechte Karroselle, Schau- on Amüseerbude, Varjetehs on Wanderkommödijante, ne Flüh- on ne Freiloftzerkus, Arteste on Akrobate on noch vill mieh. Et es nit düer (Familljekaht 11 €) on leecht ze fenge: A 1 - Usfaht 111 - on dann de Henwiesschelder folje. Kickens och 'www.kommern.de' odder froch de Häre Faber on Mangold (Tel. 02443-99 80-0). Vill Verjnöje.