wenn hee eene freiwellich mieh Stüer zahle well als wies hä moss, es mr iher jeneicht, däm als Anachronest enzeordne denn als Altroest. Janz besongersch dann, wenn et sech dobei öm Milljonäre handele deht, die sare, dat de Vermöjensbestüerong en Deutschland vill zo niddrich sei. Dat es och so. Met 0,8 % vom Brottosozjalprodokt lieje mr em Engk von de Skala. De Japse hannt 2,8; de Yänkies 3,2; de Welsche 3,3 on de Tommies sojah 4,3 %.

Als 2005 ne Krees öm de Hamburjer Reeder Pitter Krämer deswäje bei Merkels Anchela on Müntes Franz en Anhäwong von de Vermöjensbestüerong anjefracht hät, hannt die sech us Schiss vör de Lobbyjestebajasch, die dojäje wor, fass en de Bux jemaht. Onjeachtet von de klamme Kasselach; onjeachtet vom Jrondjesetz, wonach Eejedom verpflechtet; onjeachtet vom enternazjonale Verjleech on onjeachtet von däm alde Spetzestüersatz von 95 % bei de 1. Rejierong Adenauer.

Jetz esset wedder so wiet. E Milljonärskreppke öm Bruno Haas on Haltermanns Susi hät de Jedanke wedderbelävt: "www.appell-vermoegensabgabe.de". Se rechne vör, dat mer dodörch fass jenausovill Stüerjeld mieh erinkreeje wöhd wie de Nüverscholdong usmäht. Dat wöre so veehzich bes fuffzich Milljarde. Wette, dat dodruus wedder nix wöhd. Et sei denn, mr wöhd mech zom Bondeskanzler wähle