zenger de ehschde Bondesdachwahl 1949 jöwet Öwerhangmandate. Dat passeeht dann, wenn en Pahtei mieh Tirektmandate kritt als ehr prozentewal zostonn. Die darf se dann trotzdäm behalde. Als Öwerhangmandate. Weil dovon en de Haupsach de jroße Pahteie profiteere, es dat System nit jerecht. 2wee Börjer hadden dojäje jeklacht on letzt Johr vom Verfassongsjerecht Reiht bekomme. Bes Juni 2011 moss dat afjestellt sinn.

Em Feberwar des Johr hadden de Jröne deswäje ne Jesetzentworf en de Bondesdach enjebraht för öm dat ze ändere. Letzde Friedach wohd de Andrach afjelennt. Von de CDU/CSU, weil die bei de nähsde Wahl wahrschinglech dovon als eenzije profiteere wehde. Von de blaujäle Ömfallerpahtei för de Besserverdeener, weil die sech bei de chressleche Onijon vörsechtshalwer schomol ansölze well. Äwwer waröm -öm Hemmelswelle- hät de SPD doför jestemmt?

Dat es för mech eens von de onerklierleche Phänomene. Et jov kinn Koalezjonsverenbarong, wonoch dat nödich wor. Mr hät dr Endrock, dat dä Münte alles deht, öm de Wahl nit ze jewenne. Dönnbrettbohrer Frank-Walter als Kanzlerkandedat on dat strikte "Enä" von em zo de Lenke send 2wee wiedere Hendernesse för öm ja nit widder mol de Richtlinnije von de Politek bestemme ze mösse. So wöhd Müntes Franz zom Dodejräwer von de SPD.