wemmer sech däm Ullala ehr Usföhronge zo de Affär met ehre Deenstware anhöre deht, kammer werklech de Pimpernell kreeje. Jäddesmol wenn die dr Mull opmäht, öm ons dozo wat ze verklamüsere, wöhd die verfahrene Sittewazjon noch schlemmer. Tarne on Döösche, Vertusche on Verschleiere, Hochmot on Bockstähzichkeet losse leider Joddes nit de Endrock opkomme, et hee met en ihrehafte Person ze donn ze hann. Mar dat zojäwe, wat soweso schonn ant Lecht jekomme es, sowie de Verweijerong zor Öwerpröfong von de Urlaubsfahde us de Vörjohre, lösst se nor noch deefer em Löjesomp versenke.

So wöhd se, wies och schonn Vossens Monika vör dree Woche konstateehden, zom decke Klotz am Been vom Möchtejähn-Kanzler Frank-Walter. Dä häddet wohrlech ohnehen schonn schwier jenoch. Ofwoll hä malk alle nor denkbare Versprechonge mäht, om sech bei Jott on alle Welt Leevkengk ze mache, sech on de Wohrheet dobei so stärk verbeeje deht, dat mr nimmieh weeß, wo do bowe odder onge es, hät de nit dr Momm, se us sinnem Kompetenzteam ruszeschmieße.

Waröm? Weil hä dann noh sinn Wahlnidderlach sare kann, dat Ullala wöret enschold on nit hä. Weil hä nämmech däm Ullala us sozjalestesche Soledaretät nit de Schasslawitt jejowe hät. Nit schad dröm, wenn die janze Mischpoke en de Versenkong verschwendet.