et wor vom 9. zom 10. Mähz 1977 als dä en Amerika läwende polnesch-französesche Rajmund Roman Liebling, (43) och bekannt als Roman Polański, de 13 Johr alde Samantha Gailey onger dem Vörwand, se för e Modemajazin fotojrafeere ze wolle, en et Huus vom Kolläch Jack Nicholson jelockt hät. Do hät hä dat Mädche onger Allolol on Drore gesetz on verjewalticht. Foljende Nacht wohd hä verhaftet on wäjens Verjewaltijong, Sodomie, Kengermessbruch on Afjov von jefährleche Drore an Menderjöhrije bescholdicht.

Weil hä sech em jerechtleche Vörverfahre des onjesetzlechen Jeschlechsverkiehrs met en Menderjöhrije scholdich bekennt, wohd hä noh Zahlong von 2.500 $ als Kauzjon bes zor Anklareerhäwong op freiem Foß jesetzt. En de Verhandlong am 18. Mähz 1977 wohd hä för zor pyschijatresche Beobachtong wedder en Haft jenomme. Noh 42 Däch es hä von do noh Europa jeflohe on zengerdäm nimmieh noh Amerka jejange.

Weil do äwwer ne enternazjonale Haftbefähl erlasse wor, es hä vörjestere bei en Faht von Frankreech noh de Schweiz an de Jrenz verhaftet wohde. So wiet – so jot. On all denne Dolle, die sech nit entblöde ze sare, dat dat nit nödich jewäse wör, meut ech nit wönsche, dat denne ehre menderjöhrije Dauters mol verjewalticht wehde, domet se liere, dat vörem Jesetz alle jlich send.