Wickerts Uli, ex Mister Daresschau, säht: "Jauner moss mr Jauner nenne". So heeßt och dat Bohk, wat hä jeschreewe hät. Dodren jeeßelt hä de Benotzong von Euphemesme, dat send verschönijende Ömschriewonge, anstatts klorer Wöht. Äwwer et jövt noch mieh, die för klore Sproch send. Mattes, ne Apostel, säht (5, 37): "Üer Red sei jo, jo, nä, nä. Alles wat dodröwer es, es vom Öwel". On och Sarrazins Thilo, Exfinanzsenator en Berlin on jetz Bondesbänker, es ne Frönd von klore Wöht.

En nem Artekel för de Herwsusjov 2009 von de Zietschreft "Breefke Enternazjonal" hät hä akzentueeht zor Lare von Berlin Stellong betrocke on dobei och kee Blatt vörem Mongk jenomme. Et lonnt sech, de Artekel en Jänz ze läse. Hä hät akribesch de Lare von Berlin darjestellt on opjezeecht, wo on von wäm welche Fählers jemaht wohde send. Sarrazin hät sech do och analytesch met dem Problem von de mangelnde Entejrazjon von törkesche on arabesche Immejrante befasst.

Alle Betroffene send op de Barrikade jejange on hannt jesaht, dat wör en Affronteerlechkeet för se. On och all die, die meene, se mösste ehr Mänteleche emmer em Wengk von de poletesche Korrektnes hänge, hannt sech nit entblödet, fesszestelle, dat mr dat so doch nit usdröcke künnt. Äwwer wie denn, leewe Vörturner von de Jröne? Wie denn?