letzde Friedach es de 15. UN-Klimakonferenz en Koppenhare zo Engk jejange. Do hadden sech 192 Staate jetroffe, öm e Afkomme zom Klimaschotz ze beschleeße. Dat hät nit jeklapp. Kee Wonder, denn et es onmöchlech, de Entresse von so vill Länder onger eene Hot ze brenge. Dat wöhd bei de Nohfoljekonferenz en Mexiko och so sinn. China zom Beispill well sinn Endostrie forzeere, on de Verträder us Bimbostan schreie doch nor deswäje noh Usjleechszahlonge, weil se sech denne ehre Vörtorner domet de Täsche fölle wolle.

Wat also donn, öm beem Klimaschotz doch noch vöranzekomme? Janz enfach. Wie doht Kästners Erich so schön sare "Et jövt nix Jodes. Usser mr dohdet". Ons Rejalt weeß dat, denn die hät zo sinnem 100. Jebohtsdach ne Breefmärkeblock erusjejäwe, wo de Sproch opjedrockt es. Wat heeßt dat nu för ons? Dat heeßt, enfach mem Klimaschotz anzefange, ohne drop ze wahde, dat doför e enternazjonales Afkomme jetroffe wohde es.

De eejeständije Entweggelong von Ömwelttechnolojie brengt ons Endostrie op Duer jesenn secher mieh Vör- als Nohdeele. Wenn de nit ernüerbare Enerjie ehschmol so knapp on düer jewohde send, dat en de Länder, die sech jetz dem Klimaschotz verweijere, kinne mieh de Sprit för si Auto bezahle kann, wehde die och drop komme, dat ehre Ejoesmos Dommheet wor.