die von raffjierije Bänker usjelöste Finanzkris es ons noch bewosst. On och, dat de Bänker et jot verstange hannt, de Jewenne afzekasseere on de Polliteker dovon zo öwerzeuje, dat för Verloste de Staat enzestonn hät, weil annesons dat janze System zosammebreche wöhd. So hät Ackermänns Jüppke ons Rejalt dozo jebraht, de Zockerbank Hypo Real zo suteneere. Dobei hadden dä Schubbejack äwwer nit dat Jemeenwoll em Visier, songern sinn Deutsche Bank, die massiv bei Hypo ongajeeht wor.

De Polliteker hadden drop versproche, Spekolazjone per Jesetz e Stöckske vörzescheewe. Weil äwwer nix passeeht es, mahden de Raffzäng wieder wie besher. Se spekoleere jetz vör allem met jriechesche Staatsanleihe. Wemmer Jriecheland wie jedes angere zahlongsonfähije Ongernähme pleite jonn losse wöhd, so wöre dovon en ehschde Linnich de Spekolante betroffe. On dobei och de Deutsche Bank, die do fies drensteckt.

Deswäje versöhke die jetz widder met alle Meddel, de Pollitek dovon zo öwerzeuje, dat dat de Anfang vom Weltongergang för de €URo wör. Esset äwwer nit. Denn e Engk met Schrecke es emmer noch besser als e Schrecke ohne Engk. Weil de EU-Bestemmonge janz klor tirekte Hölp för angere Metjleeder verbiede deht, donntse jetz arjumenteere, se wöhde nit de Hellene hölpe, songern däm €URO.