de Schlacht es jeschlare. De Wahl vörbei. De Polwerdamp hät sech vertrocke. Alle send Siejer. De Chressdemokröte send stärkste Pahtei. De Sozjaldemokröte verjleeche ehr Erjävnes met dem von de Bondesdachswahl 2009. De Jröne hannt ehr Stemme fass verdubbelt. De FDP hät 0,5 % mieh als 2005. De rode Socke hannt de 5 %-Hörd jeschafft. De Pirate kreeje för ehr 1,5 % Wahlkampskoste erstattet. So och "pro NRW" för ehr 1,4 %.

Bes de Zahle äwwer fessstunge, wore doch so ennije Hendernesse ze öwerwende. Dat jildet ensbesongersch för Kölle. Do wor schonn de Uszählong von de Bondesdachswahl 2009 total chaotesch verloofe. Äwwer do hannt die nix drus jeliert. Och desmol es dat Zälle bei denne als wedder voll en de Bux jejange. Do wossden sojah e paah Wahlhölper nit, dat et desmol 2wee Stemme jov on erklierden errtömlech vill zo vill Stemme als onjöldich. Met Ongerstötzong dörch et städtesche Wahlamp mosst doher so off nohjezällt wehde, dat Helja Block als Landeswahlleiter ehsch öm Veehdel noh 2wee am Mondachmorje dat endjöldije Erjävnes verkönde kunnt. En Düsseldorf sare se dozo hämesch: "Domm jebore, nix dozojeliert, domm jestorwe".

Äwwer die sollden ehr Nos nit zo hoch drare, denn hee mösse se ehsch noch et Prozentrechne öwe. Dat hät nämmech och nit op Anhieb jeklapp.