Et reecht vöre on henge nit


Leev Lütt,

ons Rejalt jehdet wie private Famillije: Ki Uskomme mem Enkomme! Et Jeld reecht vöre on henge nit. Deswäje: Usjowe köhze on Ennahme erhöhe. Am Beste beeds zosamme. För Kleenverdiener hät de Verbruhkerzentral jetz de Möchlechkeete för en Penunse-Optimeerong en nem empfählenswähde Böhkse zosammejefass: "E besske Kohle jot anläje. Us wennich Moppe dat Beste mache" (ISBN 978-3-940580-48-1). Die 7,9o € doför lohne sech.

De Schwazz-Jäle em Bond hannt lang öwerlaht wie se dat Loch stoppe künnte, wat se zovör selfs opjeresse hannt. Näwer Köhzonge em Sozjalbereech, die vör allem zo Laste von de ohnehen Enkommensschwache jonnt, hät mer nor Afjowe för Fliejer, Kähnkraffwerke on Finanztransakzjone beschlosse. Met Röcksecht op de Besserverdeener-Pahtei wohd äwwer wäder de Spetzestüersatz erhöht noch de sibbeprozentije Märchestüersatz afjeschafft.

De Zahl der Bondesländer, Pahlamentsafjeordente on Staatssekretäre ze halbeere; Diäte on Pangsjone von Afjeordente on Minester annet Entjelt för Ärbiedslosse ze koppele; Koste för Bullizeiensätz bei Sportsveranstaltonge de Vereene opzeerläje on de Kerche nimmieh de Jehälter för de Beschöff ze zahle, traue se sech nit eran, ofwoll do rechtich Schotter erinköm. Weil, dat jeng an de eejene Kurantebüdel odder wöhd Wählerstemme koste.


Nix för onjot. Bes nähste Woch.
Üere
Charle-Manes