mer wore op Urlaub. Rondreis mem eejene Ware dörch Södnorwäje. Veranstaltet von de Color-Line. Zoehsch noh Kiel. Do op denne ehr Pont. Mann es dat ne Dampfer! Mr hät dat Jeföhl, de janze Kölner Dom wöhd do erinpasse. Schöne Kabine op nem luxorjöse Scheff. Et fählden an Nix. So wohd dat en komfortable Krützfaht noh Oslo.

Do anjekomme jeng et loss. Zom vorjebochte Hotel. Medde em Zentrom. Also op de Söck on loss. Ne kleene Stadtplan met tourestesche Henwies wor alles wat mr bruchden, för öm de Stadt ze erkonde. Nähste Morje Start zor Rondreis. Op de Kaht jekickt on nohm Motto "De Wäch es dat Ziel" en schöne Streck zom nähste Hotel (en Gol) rusjesöhkt. Jroßahdije Landschafde on tolle Natur mahden de Faht zom Erlävnes. So och op de wiedere Etapp noh Berjen on von do us lans de Köst zoröck bes Oslo.

Dat Wäder wor jot. Bes op eene Dach emmer Sonnesching on so öm de 20° C. Et wohd fass janit donkel. Meddsommernaht. Öwerall drusse Fiere zor Sommersonnewend. Jong on Alt entspannt am Klöne, Jrille, Drenke, Senge on Danze. Rond öm de Meddsommernahtsfüer. De Lütt brahden de Stemmongsfonke schnell zom Öwersprenge. Kohzöm: Ne empfählenswähde Urlaub – met een kleene Enschränkong: De Hotels en Oslo on Berjen wore zwor zentral jeläje, künnden äwwer jähn eene Stähn mieh hann.