Duisburch wä esset enschold?


Leev Hanni Kraft on Sylvie Löhrmann,

ons all send de schreckleche Ereechnesse von de LoveParade letzde Schabbes en Duisburg schmähzhaff jäjewähdich. 21 Personne ripsch on öwer 500 verletzt. Jonge Lütt, die mar jet fiere wollde. Dozo vill angere, die ne seelesche Schock erledde hannt. An se all, öwer die dodörch onsachbar Leed erinjebroche es, ons oprichtich Metjeföhl.

Öwerall Fassongslossichkeet on de Froch, wie dat bloss passeere kunnt. De Verantwortleche eiere eröm. Se verträde de Meenong, dat alles rechtich jemaht wohde sei. Kinne von denne deht Fähler enrööme. Jäde scheevt de Verantwohdong op angere. Alle verweese op de Ermeddelonge von de Staatsanwaltschaff. Dörch die wöhd jewohr wehde, dat nit sie, songern angere för de Katastroph verantwohtlech seie.

Och Schreckeberchs Micha, dä als Professor för Stauforschong dem Secherheetskonzepp zojestemmt hät, op dat dann alle angere opjebaut hannt, es sech keener Schold bewosst. Hä, dä sech en sinn Forschonge spezijell met dem Problem vom Verhalde von Foßjänger en sonn Sittewazjone befasst hät, hät dozo wöhtlech usjeföhrt: "Mer losse de (Foßjänger) jäjeenanger loope – Jäjeverkiehr es en spannende Sach. Dä orjaniseeht sech selvs, do jövdet en räjelrechde Sporbeldong." Frau Kraft on Frau Löhrmann: "Künnder sonne Professor nit ussem Verkiehr trecke?"


Nix för onjot. Bes nähste Woch.
Üere
Charle-Manes