wemmer anfängt, Jura ze stodeere, wöhd eenem met als Ehschdes beijebraht, dat Rääsch met Jerechtichkeet so jot wie nix ze donn hät. On et kann jot sinn, dat mr eenes Dachs selfs met dem Problem konfronteeht wöhd. Dat es dann leider verdammp onanjenähm för eene, dä dovon betroffe es. Äwwer Jottseidank kütt dat hee bei ons nit so off vör als wies en angere Länder.

Besongersch off kütt dat en Länder vor, die nit jrad sonn demokratesche Struktur hannt wies mer. Meest es do dann och noch de Pressefreiheet enjeschränkt. Dat jövdet fass öwerall. Staatlech jelenkte Justiz kammer en Burma am Fall Aung San Suu Kyi; en China am Fall Liú Xiaobo; en Russland am Fall Chodorkowski on en Weeßrussland am Fall Wladimir Neklajew afläse - oswosf. En Besongerheet es Italije. Do lösst Berlusconi, wenn emm erjens en Anklach drohe deht, enfach de Jesetze zo sinn Jonste ändere. Schlemm send och alle Länder, bei denne de Räsong dÄtre de Bezoch op erjenseene Jott es. Wies beem Vatekan odder bei Persije. On mangs denne widderröm send die de schlemmste, bei denne die eslamesche Scharija als Rääschsjrondlach deene deht.

Et jeht äwwer och angersch. En Israel zom Beispill. Do es nämmech jetz de Ex-Staatschef Mosche Katzav wäjens Verjewaltijong on sexejelle Nötijong vörm Kadi jezerrt on verknackt wohde. Hä well zwor en Berofong jonn. Dat ängert jedoch nix en de Tatsach, dat do sonne Prozess öwerhaups möchlech es. On de Presse dodröwer usföhrlech berechte kann. Schapo! En Stähnstond för de Rääschsstaatlechkeet! Do künne sech och de Amis met Juantanamo en Schiev von afschniede.