en 2009 hannt zerka 3.300 Bedrievspröfer hee en NRW 5,8 Milljarde €URo an Stüernohzahlonge erwerkt. Dat send so zerka 1,75 Milljone pro Pröfer. Vill Jeld för et ärme NRW, och wenn dovon ne Deel an Bond on Jemeende afjejäwe wehde moss. So wor et denn och nor konsequenz, dat onse Finanzminester Nöppes Walter-Borjans nüe Stüerpröfer enstelle well. De Finanzverwaltong soll bes 2015 so öm de 200 Kräfte verstärkt wehde. Usserdäm solle des Johr rond hondert Anwärter för de höhdere Deenst enjestellt on do zo Stüerpröfers usjebeldet wehde. Miehenohme kann ons Rejalt secher jot jebruche. Besongersch wo et Landesverfassongsjerecht denne jrod schonn ne Deu jejäwe hät, dat dat met dem Scholdemache wohrschinglich nit janz so verfassongskonform es.

Domet wören dann sonn Fäll wie bei beem Moltimilljardär Flick nimmieh so leecht möchlech. Do korseehde nämmech 1997 en CD met stüerrelevante Date vom lichtesteener Vermöjensverwalter Bätes Batliner. Weil Flicks Fritz Charly do och Schwazzjeld jebonkert hadden, mahden hä plöck en strofbefreiende Selfsanzeich on zallte 150 Milljone Mark Stüere noch. Drop hädden de Behörde de Fall enstelle solle. Weil se äwwer op noch mieh Jeld us wor, hät se versöhkt, och en Amerika noch jet ze ermeddele. Do dohden dann äwwer e paah flickophile Biampte (Jeld stenkt nit) dat Verfahre so lang verzöjere, bes 2007 de afselode Verjöhrong enjeträde wor. Drop kunnden se de Flick nit mieh an de Hammelbeen krieje. Dat Verfahre mosst enjestellt wehde. Penunseminester Helmot Linssen (CDU) mossden die 150 Milljone Mark (jetz 75 Milljone €) an dem Flick sinn Erwe zoröckjäwe. So süht en Qualefikazjon us, för öm Bondesschatzmeester bei de CDU ze wehde.