Riesen(be)driss beem LaLaLa-Fest


Leev Lütt,

weil beem letzde europäesche LaLaLa-Fest en Norwäje de deutsche Beidrach wennijer schleiht wor als all die angere, es dem Raab sinne Schötzleng, et Meyer-Landruts Lenche, do zom Siejer jekört wohde. Noh de Satzong von die Veranstaltong moss nu dat Land, dat de ehschde Platz jemaht hät, et nähste europäesche LaLaLa-Fest usrechte. So weit – so schleiht, denn sonn Veranstaltong deht vill mieh koste als wie se enbrengt. Alleen Entendant Lutz Marmor vom fäderföhrende NDR moss doför mieh als zwölf Milljone rusröcke. Von ons Rondfonkjeböhre!

Och op Düsseldorf komme so vill Koste zo, dat mr sech nor an de Kopp fasse kann on fröcht, wat däm Elbers Dirk jeredde hät, do zozestemme. För öm nor ee Beispill von ville ze nenne, sei op die hernrissije Idee verwiese, eejens för Fortunas Zweetlijakicker e nü mobiles Stadiom opzebaue. Hädden de Pimpfe von Meiers Nöppes nit för die Ziet em Paul-Janes-Stadiom speele künne?

Äwwer et es nit eso, dat janix ongernomme wöhd, för öm de Koste ze minnemeere. "Em beste wör", so simmeleehden Quibeldeys Ralf on Gartzkes Mätes, Verantswohtleche för dat Spektakel, "wemmer ne Hoope Lütt kröchden, die för lau ärbiede wöhden!" Mennesdens 500 –besser mieh– Hölper solle domet jelockt wehde, dat eenzichahdije Fläär von de jröttste Musikschau der Welt metzeërläwe. Ofwoll se do nit erindörfe. Et jövt och kinn Ongerkönft noch Opwandsentschädijong doför. Do hadden et selfs Sklave besser. Trotzdäm jövdet offensechtlech jenoch Blöde, die op de Bedriss erinfalle. Wemmer dovon nix metkreeje well, fährt mr am beste wiet fott. So bes en de zentralsasiatesche Wöste von Usbekistan. Do hanntse secher nix met dem LaLaLa-Driss am Hot.


Nix för onjot. Bes nähste Woch.
Üere
Charle-Manes