Pirate, Freibeuter on Korsare


Leev Lütt,

wat hammer ons en minn Jurendziet emmer öwer de Seeräuberfelme jefreut. Öwer Errol Flynn als  Här der sibbe Meere, Burt Lancaster als de rode Korsar on de edle Freibeuter Sör Francis Drake. Alle Seeräubers wore ons Idole. So wies jetz de Johnny Depp met sinn Pirate en on us de Karibik.

De Ziede, wo de Felme spellden, wore emmer als lang her. Mr kunnt sech nit vörstelle, dat sech sojet hütt noch ereechne künnt. On doch esset eso. Eemol em chinesesche Meer, wo Indonesije, Malaysija on de Philippine betroffe send. Vör allem äwwer von Somalija usjehend praktesch em jesamte indesche Ozean. Et verjeht kinne Dach, womer nit höht, dat die met ehre Pissböötches als widder ne decke Pott jekapert hannt. Onfassbar, dat mr nit en de Lare es, denne et Hangkwerk ze läje. On dat, ofwoll ne Hoope EU-Kriechsscheffe zor Piratebekämpfong dohen verläht wohde send. Och de Bondesmarine es do. Trotzdemm hannt die bes jetz kinne erfolchriche Ensatz henjekritt.

Mar Scheffe us Dänemark, Holland, Indije, Södkorea, Malaysija on de USA kunnden erfolchriche Akzjone jäje de Pirate vermelde. Mr fröcht sech emmer widder, woraan et woll lütt, dat de deutsche Marine do nix jebacke kritt. Och von denne ehre Levante-Ensatz vör Israel hann ech noch nit een Erfolchsmeldong metjekrett. Mache die sech do nor ne schöne Lenz on kasseere decke Zolare för Uslandsensätz? Odder loch et an de böwerste Befählshaber? Sowoll Jung als och de Juttenberch hannt sech jo nit jrod met Rohm bekleckert. Ech hann minn Zweifel, of dä de Mäzjähr et do jetz besser mäht. Am beste esset woll, wenn de Reedereie all selfs för de Schotz von ehre Scheffkes sorje. E paah Vörsorjemaßnohme send alleweel bellijer als emmer decke Lösejelder ze bezahle.


Nix för onjot. Bes nähste Woch.
Üere
Charle-Manes