De CSU on de PKW-Maut


Leev Lütt,

vor öwer fuffzich Johr hann ech minne Föhrersching jemaht. Als Muschkote beem Barras. Hät nix jekoss. Wor em Wehrdeenst met dren. De Ömschriewong op Zivilföhrersching problemloss för jrod mol e paah Märkske. So wohd ech 1958 op de automobile Minschheet lossjelosse. Ech hann et jenosse, zomol ech mech och kohz drop mi ehschdes Äutoke koofe kunnt. Ne Käfer – Baujohr 49. 27 PS, Brezzelfinster on Lingezochbrems. Nit synchroniseeht. Beem Rongerschalde mosst emmer Zweschejas jejowe wehde. Statt Blinker rähts on lenks usklappbare Winker. En Spritanzeech jowet och nit. Doför ne kleene Häwel em Foßroom. Wennste wäjens Spritmangels stonn jebleewe wors, hässe dörch Ömläje von däm Häwelche op Reserwe ömschalde künne. On wennet jerähnt hät, kom emmer Wasser erin. För öm dat losszewehde, eenfach e Loch em Bodem jemaht. Do leef et dann widder aff. Dodörch kunnt och de Lingezochbrems em Wenter nit so leecht enfreere.

Trotzdäm wor et Fahre domols noch e Verjnöje. De Spritstüer wor niddrich. Stroßemaut, Pickerln on Staus wore onbekannt. So jöckden mer em Urlaub krütz on quier dörch Europa. Von Kalabrije bes Skandinavije. Von Istambol bes Lissabon. Nor do en Portujal mossde mer jet Bröckezoll zahle. Drop hannt mer spontan beschlosse, do nie mieh henzefahre. Doch dat System fand Anhänger: Maut för Alpepässe. Transitjeböhre en Buljarie. Privatautobahne in Italije. Tunnel- on Bröckezoll en Norwäje. Stroßezoll en Frankreech. Vinjette bei de Iedjenosse on en Östreech. LKW-Maut bei ons.

Koom noch e Land en Europa, dat de Autofahrers nit för öffensleche Stroße schröppe deht. Jetz wolle Ramsauer on Seehofer och noch PKW-Maut hann. So kammer och e eenich Europa schaffe.


Nix för onjot. Bes nähste Woch.
Üere
Charle-Manes