an on för sech es et jo e Ondeng, wemmer säht, dat dat Jeld zo düer jewohde sei. Ware odder Deenstleestonge künne düer wehde, denkt mr, äwwer nit Jeld. En Mark blifft en Mark on ne €URo blifft ne €URo. On doch esset eso, dat och Jeld zo düer wehde kann. Denn Jeld es och ne Ware, die mr anpacke on föhle kann. Sowohl de Mönze als och de Scheenches. Us aktejellem Anloss wolle mer hütt mar öwer de Mönze kakele. De Scheenches komme nähsde Woch draan.

Näwer de acht bekannte €URo-Mönze (1 ct. - 2 €) jövdet jo och noch ne Hoope Jedenkmönze, wovon de mieschde dovon us Selwer jemaht wehde. Luurens dozo och de ehschde dree "Nix för onjot"-Artekele us 2009. Beem Bejinn von de €URo-Mönze 2002 loch de Selwerpreis bei 5 $ pro Onze. Dann stiech dä langsam an. Em Feberwar des Johr bejann äwwer ne steile Opstiech. Von 19 $ bes op öwer 49 $. Domet wor de Matrijalwäht von de mieschde Selwermönze höhder als de Nennwäht. So mossden de europäesche Mönzanstalte jäjestüere. De nähsde Normalpräjonge von Jedenkmönze send deswäje nimmieh us Selwer, songern us Machnimat. Dat es en Kopper-Nickel-Lejierong. Selwerpräjonge jövdet zwor och noch, äwwer mar en de Qualetätsstof "Poleehde Plaht". De Usjowepreis doför lütt dann äwwer so fuffzich bes hondert Prozent öwerm Nennwäht.

Dat hadden mer schonn emol. So wor de Heiermann von 1951 bes 1975 en Selwer-Lejierong on 12,2 Jramm schwier. Weil äwwer de Bröder Nelson on Bätes Hunt en de sibbzijer Jöhr dörch ehr Spekelazjone de Selwerpreis hochjedreewe hadden, wohd von 1975 bes 2001 för de Heiermänner och en Kopper-Nickel-Lejierong jenomme. Usserdäm wore die dann nor noch 10 Jramm schwier.