zenger 1932 jövdet en Brögge, dat es e klee Städtche am Nidderrhing, och e Laiethiater. De Spillschar Brögge. Zengerdäm wehde do mieh odder wennijer räjelmäßich Stöcker op de Bräder jebraht, die de Welt bedüde. Dat Reppetowar jeht dobei von Klassik bes zor Moderne, on von Trajödije bes zo Schmonzette. Öm sojet handelt et sech och beem aktejelle Stöck "Zickenalarm", dat de Spillschar för 2011 op'm Projrammzeddel hät. E Stöck von Boomjahdens Jürjen. Met fuffzehn Aktive op on henger de Böhn hät René Helmes e öwerus torbelent Lostspill enstodeeht.

Woröm jehdet dobei? Kohz jesaht öm de Kuddelmuddel, dä dodörch entsteht, dat dä fresch widder Single jewohdene Stefan för de Ziet von sinnem Urlaub en vertrauensvolle Person söhke deht, die op de Bud oppasse soll. Ne sojenannte Wohnongssitter. Doför hät hä en entsprechende Anzeech em Lokalblättche opjejowe. Met sinn Tellefonnommer. Weil Tellefonnommere per Röckwähtssöhk em Enternet janz schnell zojeordnet wehde künne, bejinnt domet dann och prompt et Verhängnes. För Warnonge von sinn Motter on sinnem Frönd Neres esset do och schonn zo spät.

Denn et entresseere sech för die Bud vör allem vier Ladies, die de Wohnongsenhaber am leevste metöwernämme wolle. Dann taucht do och sinn Ex Nicoll met ehrem nüe Quienes op. Die wolle äwwer nor ne alde Teller us de Bud stibitze. För noch mieh Dörchenein sorje ne Encochnito-Trämp on Stefans Nohbersche Britta, die em schonn lang verihre deht. All dat wöhd zo nem kohzweilije Stöck zosammejeföcht on met amösante Gägs jarneeht. De langanhaldende Appelaus es mieh als verdennt. Dree Zosatztermine fengder onger "www.spielschar-brueggen.de". Zaut Üch!