zenger zweeonhalf Woche löppt de Frauefoßball-Weltmeesterschaff. Hee en Deutschland. 16 Frauschafte send anjetrode, för öm ze jewenne. Dobei och de deutsche Mädches. Weil die –em Jäjesatz zo de Jongens– ehre beede letzde Weltmeesterschafte jewonne hadden, hannt se em Vörfeld och deck op'm Potz jekloppt. Öwerall hochmödije Spröch: "Dredde Plätz send nor wat för Männer!", "Männer mer räche Üch!" odder "Männer speele – Fraue sieje!" on derjleeche mieh.

Entsprechend hoch wore die Erwahdonge vom deutsche Foßballpoblekom för op e nü Sommermärche. Nit nor de Speele von de deutsche Frauschaff restloss usverkooft, songern de mieschde angere och. Alleen mieh als wies 74.000 Zokicker beem offezjelle Eröffnongsspeel en Berlin. Do jeng et jäje Kanada. Neids Silvie ehr Mädches jewanne met 2 :1. Och dat Spill jäje Nijeria wohd jewonne: Met 1 : 0. Domet wore se schonn för et Veehdelfinal qualefezeeht. Dat afschleeßende 4 : 2 jäje de Welsche brahden de Jruppesiech. För et Veehdelfinalspill wohden ons de kleene Japse als Kanonefotter zojedeelt. Somet wor de Dörchmarsch ent Finale nor noch en Formsach.

Letzde Schabbes fand dat Spill dann statt. Weil ech för dä Owend äwwer schonn de Besöhk von en Opföhrong von Tucholskys "Schloss Jripsholm" dörch et Laiethiater 'Lämpefeewer 98' enjeplant hadden, hann ech dat Foßballspeel opjezeechnet on mech dann nochem Thiater anjekickt. Toll, wie de Mädches jespillt hannt. Nit de onsre, songern de Schletzoore. Verdeent 0 : 1 jewonne. De Entdööschong bei de deutsche Foßballexperte wor jroß. Äwwer nit nor die wore entdööscht, songern ech och, denn de Lämpefeewer-Vörstellong wor nit doll. Die hammer schonn besser erlävt.