Törke ohne Ensecht


Leev Lütt,

mer wesse jo, dat op de Ähd vill schreckleche Denge passeere. Dat wor en de Verjangeheet eso. Dat es hüttzedach eso. Dat wöhd och en Zokonft eso sinn. Dat jövdet sowoll bei eenzelne Minsche als och bei kleene on jröttere Kreppkes. Bes erop zo janze Völker on ehre Föhrer. Do nämme mer Deutsche wäjens de duusend Johr ongerm Jröfaz Adolf ne onröhmleche Platz en de ehschde Reih en. De Schrecklechkeede ussem Holokaust send ne Deel von ons. Mer bekenne ons -Jahwe sei Dank- zo de em Dredde Reech bejangene Onsellichkeede on versöhke, se opzeärbiede. Et es nit enfach. On Veele fälldet schwier, sech zo de Ontate us ehre Verjangeheet ze bekenne. E Kreppke, wat sech met sojet janz besongersch schwier deht, es de törkesche Rejalt.

Dä Vörjängerstaat von de hüddije Törkei wor dat Osmanesche Reech. Ne Villvölkerstaat, dä sech öwer Södosseuropa, Vörderasije on Nordafrika erstreckden. Äwwer wie dat met alle Emperije so emmer widder passeeht, eenes Dares fange se an ze bröckele on falle dann langsam usenanger. Als dat em nünnzehnde Johrhondert so met dem Osmanesche Reech lossjeng, wohden natörlech Söndeböck doför jesöhkt. Die wore dann met de relejöse on ethnesche Menderheede, die em osmanesche Stammland lävden, och schnell jefonge. Met de Verfoljong von de chressleche Armenier bejann eene von de  jröttsden Völkermorde. Offwoll dat enzwesche ne anerkannte historesche Fakt es, deht beslang jäde törkesche Rejalt dat löchne. Wenn angere Länder henjonn on dat Löchne vom törkesche Jenozid an de Armenier onger Strof stelle, wies jetz de Welsche onger Sarkotzy, die letzde Woch doför e Jesetz erlosse hannt, send de Törke fies suer on drohe met Sankzjone. Do moss sech Erdojan-Pascha nit wondere, wenn kinne de Törke en de EU hann well.


Nix för onjot. Bes nähste Woch.
Üere
Charle-Manes