de Schlacht -zom Johreswechsel- es jeschlare, de Polwerdamp hät sech vertrocke. Zomennes de Polwerdamp von de Silvesterböllerei. Wat es öwrich jebleewe von de Schlacht zom Nüe Johr? Persönlech hoffenslech nit mieh als wies ne Kater, e besske Öwerjewecht on ne Hoope jode Vörsätz. Wenner däm Kater so rechtich Suures jejäwe hat, es dä enzwesche verschwonde. Bei de Killos on de jode Vörsätz künnder Üch Ziet losse bes Dezämber. Dann send die och verschwonde.

Matrijell es e besske mieh öwrich jebleewe. En vill Plätz lieje noch de Reste von afjefüerde Rakete on Böllers eröm. Samt de Afschossrampe on Fläsche. En manche Stroße sammele de Anliejer dat en on deue et en de Tonn. Et jövt äwwer och Zietjenosse, die sare "Waröm soll ech dat mahke? Dat es Opjov von de Awista. Ech zall doch jenoch Mölljeböhre. Usserdäm es minn Tonn soweso schonn voll. Ech hann dat Züch do so zosammejepröfft, dat do beem beste Well nix mieh renjeht". Schön, äwwer Möllverdechte darf mer äwens nit. Wäder met Moskelkraft noch met erjenswelche Hölpsmeddel. Dat es sojah pönaliseeht. So stehdet jädefalls en fass alle Affallsatzonge en NRW. So moss och de Tonn bezallt wehde, wenn die dobei kapottjeht. Zom angere künne de Entsorjer sonn Tonne och enfach stonnlosse odder höhdere Jeböhre doför verlange. Boßjelder künne och verhange wehde. En Ooche bes zo zennduusend €. On en Kölle sojah bes zo fuffzichduusend €. Dat brengt also nix. Dann besser op de Awista wahde. Die fahre jetz soweso en de Stadt eröm on holle de usrangjeehde Weihnahtsböömches af. För zom Komposteere. Lütt, die ehre Boom bei IKEA jehollt hannt, hannt Jlöck. IKEA nömmt die zoröck on röckt doför sojah noch fönf € Pangk för erus. Wennet nit rähne deht, mach ech mi Erbelekörvke op, on dann kreeje die de minne och.