am kommende Wocheengk esset widder so wiet… en Monnem es Jänselieselmaht! Ne tradizjonelle Trödelmaht vom Allerfeenste. Anjefange hät dat 1977 met mar sibbzich Ussteller on zerka zennduusend Besöhker.Zengerdäm fengt hä en de Räjel am letzde Wocheengk em Mai statt. Nor wenn dann jrod Pengste es, so wies des Johr, deht sech dat öm een Woch verscheewe. För des Johr send 310 Ständ anjemeldet, die sech öwer de janze alde Ennestadt verdeele. Wat dä Maht so attraktiv mäht, es, dat kinn jewerbleche Anbieter zojelosse send. En de Haupsach wöhd de Maht von Monnemer Anwohner bestredde, die ehr alde Plürre liebevoll zor Schau stelle on an dr Mann odder de Frau zo brenge versöhke. Dodörch es och de Verkoof von Nüware so jot wies usjeschlosse. Op’m kulinaresche Sektor bedeelije sech usser de do anliejende Bedriewe och vill Monnemer Vereene, die stets för ne rustikale Hochjenoss jot send. Schön och, dat off jenoch von de erzielte Ennohmee jot Deel wolltätije Orjanesazjone zojeföhrt wöhd. Zenger 2010 fengt röm on töm dä Jänselieselmaht et Monnemer Stadtfest  met ne Bärm von attraktive Veranstaltonge statt.De haupsächlechsde Onsecherheetsfaktor för e jot Jelenge von die Veranstaltonge blifft et Wäder.

Entressang och, wie et eejenslech zom Jänselieselmaht jekomme es. Dat wor eso: Monnem jövdet schonn zengerm zennde Johrhondert. Jannewar 1975 wohd dat Städtche em Zoch von de Rejionalreform de Stadt Düsseldorf zojeschlare. Dat hät de Monnemer so jestonke, dat se dojäje vör et Landesverfassongsjerecht en Mönster jetrocke send. Dat hät de Monnemer Reiht jejowe. So hanntse em Julei 1976 ehr Selvständichkeet widdererlangt. För öm de Heemotverbondeheet von ehre Börjer ze fördere, es drop -onger angerem- dä Jänselieselmaht ent Läwe jerope wohde.