De Afzock met de düüre Tellefonnommere
 

En enzewsche janz beleevde Aht för öm Lütt afzezocke, es, die dohen ze brenge, datse düüre, kostepflechtije Tellefonnommere anrope. Anjefange hät dat woll em Erotekfähnsiehe, wo de Kaffsackmösche flöteten "0190-sex sex sex!" Die Masch jibbet enzwesche fass öwerall. Dat send nu de 0900-er- on 0137-er-Rofnommere. Op dä Drieh send dann och janz normale Ferme jekomme. Ensbesongersch wore vill Sörvis-Afdeelonge von Ferme nor noch öwer sonn Nommere ze errieche. Doch domet nit jenoch: Domet de Konde och rechtich latze mösse, deht do mieschdens sonne dolle Automat alles draansetze, för öm Ziet ze schende. Ech empfend dat als zodeefst onserijös on donn sonn Läde dann schnellsdens von minn Enkooflest strieche.

Fass alle private Fähnsiehsenders dont sech onscheneeht domet (re)finanzeere. Bei de RTL-Senders es näwer Jauchs Jünther vör allem Kloses Dennie met sinn Panneschau Spetzerieder en poncto Afzock. Emmer wöhd eenem vörjejaukelt, mr künnt do prieswäht jet jewenne, wemmer mar de denne ehre 0137-Nommer anröpt odder enne en entsprechende SMS scheckt. Jäde Anrop odder SMS koss äwwer mennesdens 50 Cent! Wenn von de sexmilljone Zokicker, wat de Dörchschnett bei Jauchs Sendong "Wä wöhd Milljonär?" es, nor jäde Dredde dem Oprof folcht, dann wöhd eene janz bestemmp Milljonär – nämmech Jauchs Jünther. Do kann hä dann jot fönfduusend €URo an eene von denne, die anjerope odder jesemmst hant, afjäwe. Bei Kloses Dennie jövt et mar 250 €URo als "Jewenn"!

Weil dat so schöne Jeschäfte send, send enzwesche och de Bajuffe em Enternet on bei de Händyprojramme op dä Trechter jekomme, so de Pänz dat Jeld us de Täsch ze trecke. De Bedriss jeht lawineahdich wieder. Emmer mieh Radiosenders, Illustreehde, Ziedonge onsowieder send op dä Zoch opjespronge. Och bei de Düsseldorwer Daresziedonge on de Werbeblättches, die emmer meddwochs kostefrei verdeelt wehde, es de Method bekannt. Et wehde emmer mieh. Sojah Düsseldorfs selvsernannte Moralapostel Jörg Friedrich Hermann Kempkes, och bekannt als Manes Meckenstock, deht sech net entblöde, do kräftich metzemesche.

Dä afselode Spetzeplatz äwwer en de Afzock-Katejorie hät de Eidjenosse Berni Weber met sinn zweefelhafde Enternet-Afstemmong för de sibbe nüe Weltwonder erobert. Ofwoll die von em enszeneehde Afstemmong kostepflechtich wor on sech och de UN-Kolturorjanisazjon UNESCO dovon distanzeeht hät, hant do mieh als Eenhongertmilljone Lütt (> 100.000.000 !) metjemaht on ehr Stemm afjejowe. Dat hät däm Berni rechtich Kohle enjebraht. Do moss mr werklech dr Hot trecke. Schapo! Trotzdemm, och wenn noch so vill ze jewenne versproche wöhd, ech donn mech an sonn Akzjone nit bedeelije.

Charle-Manes